Western Visayas, may 3 new cases sang COVID-19 nga lunsay halin sa Caluya, Antique

By: Aine Grace Bravo | via DOH

ANTIQUE, April 17, 2020 — May tatlo ka kaso sang COVID-19 nga nadugang sa Western Visayas subong nga adlaw.

Sa update halin sa Department of Health 6, nadugang sanday WV 43, 45-anyos nga lalaki; WV 44 , 59-anyos kag WV 45, 65-anyos nga lalaki. Lunsay taga-Caluya, Antique ang mga bag-o nga kaso nga yara na sa facility-based quarantine. Tanan sila ang nagka-close contact kay WV 35 –ang 74-anyos nga lalaki halin sa Caluya, Antique nga may travel history sa Manila.

Sa resulta sang 140 ka specimen nga gin-test kag gin-release ang resulta kahapon, tatlo diri ang nagpositibo samtang 137 ang negatibo, suno sa DOH.

Sa kabug-usan, 45 na ang kaso sang COVID-19 sa rehiyon –walo ang naka-recover kag pito ang patay.

Iloilo province ang may pinakamadamo nga kaso nga naglab-ut sa 16.

Zero COVID-19 case gihapon ang Guimaras.