3 ka bag-o nga COVID-19 cases sa Western Visayas, nagka-contact sa una nga kaso sa Pandan, Antique — DOH 6

By: JoMaque | Abril 21, 2020

Antique – Ginkumpirmar ni Dr. Renilyn Reyes, spokesperson sang Department of Health 6, nga nagka-contact ang tatlo ka bag-o nga COVID-19 cases sa una nga kaso sa Pandan, Antique.

Una nga nagpositibo sa COVID-19 si WV Patient 39 nga 69-anyos nga lalaki nga taga-Pandan, Antique. Nagapabilin siya nga admitted sa ospital kag estable ang kondisyon.

Sa ginhimo nga contact tracing, 59 ang natultulan nga nagka-contact sa pasyente.

Suno kay Reyes, ginkuhaan sang swab ang 59 kag ginpa-idalum sa test. Apat ang nagpositibo kag may mga pending pa nga resulta.

Kahapon, Abril 19, gin-report sang DOH 6 nga nagpositibo sa COVID-19 ang 68-anyos nga lalaki nga amo si WV Patient 49 nga may contact man kay WV 39.

Kaina, naguwa ang resulta sang test sa tatlo pa ka taga-Pandan nga lunsay man positibo: si WV 50, 32-anyos nga lalaki; WV 51, 28-anyos nga babaye kag WV 52, 33-anyos nga babaye.

Lunsay man asymptomatic ang mga pasyente kag naka-quarantine.

Sa kabug-usan, lima na ang kaso sang COVID-19 sa Pandan.