By: JoMaque l Abril 22, 2020

Iloilo City—Siyam ka lalaki ang pilason lakip ang menor-de-edad sang nasalabat sang nagpasalba sang pusil ang duha ka security sang Iloilo Fishing Port Complex subong nga gab-i.

Ginkilala ang mga biktima kanday Welix Asong, 44; Jonas Delagon, 19 ; Ronnie Genovaña, 46; Edran Locsin, 20; Vincent Barrios, 36; Joebert Gabion, 31; Hermie Carboledo, 31; Crismund dela Torre, 22 kag isa ka menor-de-edad.

Suno kay Police Major Francisco Paguia, hepe sang Police Station 1, nag-warning shot sa salog una si Security Guard Judy Alvarez, 29-anyos gamit ang 12 gauge shotgun sang gintikwang sang isa sa mga pakyaw kag nakita ini ni Security Guard Romel Perez, 33-anyos rason nag-warning shot man ini sa salog gamit ang 9mm.

Ginpahayag ni Paguia nga kumpiskaron kontani sang duha ka security guards ang mga isda sa banyera nga hinakpan kag illegal nga ginabaligya sang gintikwang ang isa sa ila sang mga pakyaw.

Suno kay Paguia, napilitan lang nga mag-warning shot ang duha ka security guards bangud ginapalibutan sila sang mga pakyaw nga armado sang mga kabilya.

Na-recover sa ila ang 12 gauge shotgun kag 9mm pagkatapos nagsurrender sa kapulisan.

Estable na ang mga kondisyon sang mga nasalabat samtang preso naman sanday Alvarez kag Perez sa Police Station 1.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply