By: JoMaque | Abril 23, 2020

Iloilo City – Gin-athag ni Department of Education (DepEd) 6 Assistant Regional Director Dr. Josilyn Solana nga indi pa final nga magabukas ang klase sa Agosto para sa School Year 2020-2021.

Suno kay Solana, resulta sang ila survey sa mga ginikanan, estudyante kag iban pa nga stakeholders ang rekomendasyon nga buksan ang klase sa Agosto.

Nagapati sila nga indi pa dalayon matapna ang paglapta sang COVID-19 sa Hunyo ukon Hulyo rason nga gin-suhestiyun nila ang Agosto.

Sa Mayo 7 pa suno kay Solana mahibaluan ang pinal nga desisyon ni DepEd Secretary Leonor Briones bangud ginahulat ang approval sang Inter-Agency Task Force.

Kon matabu, may soft opening nga himuon antes ang Agosto agud i-preparar ang mga plano.

Sa pagbukas sang klase, buhinan ang numero sang mga estudyante bangud ipatuman gihapon ang social distancing. Kun sang una, nagalab-ut sa 40 ang numero sang mga estudyante sa kada classroom, tungaon ini sa liwat nga pagbukas sang klase.

Ginaduso man nga indi na whole day ang klase sang mga estudyante bangud tungaon ang ila numero.

May option man nga mag-home schooling ang pila ka estudyante. Ma-hire sang dugang nga manunudlo ang DepEd para diri.

Sa pihak sini, ginpasiguro ni Solana nga kalidad nga edukasyon gihapon ang mahatag nila sa mga estudyante.

Ginakonsulta pa ang mga pribado nga eskwelahan kon maupod sila sa Agosto nga opening sang klase.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply