By: JoMaque | Abril 23, 2020

Iloilo – Ginakwestiyun ni Iloilo Vice Governor Christine Garin sa Department of Health (DOH) 6 kun ngaa nagakalab-utan sang walo (8) ka adlaw antes ipaguwa ang resulta sang COVID-19 test sa Western Visayas.

Ini ang kaundan sang privilege speech ni Garin sa session sang Sangguniang Panlalawigan kahapon, Abril 21.

Suno kay Garin, nahangpan niya nga madugay pa mag-abot ang resulta sang wala pa naga-operate ang COVID-19 testing center sa Western Visayas Medical Center.

Pero base sa ila na-experyensiyahan sa Guimbal, naglab-ut pa sang walo ka adlaw antes nagguwa ang resulta sugod nga gin-test ang mga suspected patients sa COVID-19.

Malawig na suno sa iya ang walo ka adlaw para sa mga pasyente, pamilya kag sa banwa.

Luyag sang bise gobernador mahibaluan ang sistema sang DOH sa pagpaguwa sang resulta, kun kulang ang ila machine kag kun kulang man ang medical technologists nga nagahimo sang test.

Naga-ayo siya sa DOH nga magpa-athag agud mahangpan sang mga opisyales sa kabanwahanan kag mga residente.

Posible suno sa iya nga may mabulig ang provincial government kon mahibaluan nila ang problema nga ginapangatubang sang DOH 6.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply