45 personnel sang BJMP6, naga-quarantine sa ila opisina bangud nagpositibo sa COVID-19 ang ila personnel

By: JoMaque | Abril 27, 2020

Iloilo City – Naga-quarantine sa ila opisina sa Jaro ang 45 ka mga personnel sang BJMP6 bangud nagpositibo sa COVID-19 ang ila personnel.

Suno kay Jail Superintendent Gilbert Peremne Jr., 10 ka mga opisyal kag 35 ka mga personnel ang naga-observe sang 14-day quarantine.

Na-assign sa regional office si WV59, ang JO1 nga taga-Zarraga nga nagpositibo sa COVID-19.

Wala sang may mahimo makasulod ukon makaguwa sa regional office tubtob nga matapos ang quarantine.

Nagpasalig naman si Peremne nga indi maapektuhan ang ila operations bangud magapadayon ang ila pagserbiyo.

May mga personnel man sila nga wala naga-duty sa sulod sang mga jail facilities nga nagapatigayon sa pagdala sang ila mga kinahanglanon.

Wala sang sintomas nga nabatyagan ang 45 ka mga personnel.

Gina-check sila kada adlaw sang mga heath personnel sang BJMP6.