By: JoMaque | Abril 27, 2020

Iloilo City – Ginkumpirmar sang BJMP6 nga nakakadto ang ila personnel nga nagpositibo sa COVID-19 sa Antique sang, Abril 25.

Suno kay Jail Supt Gilbert Peremne, Spokesperson sang BJMP6, naga-duty pa ang JO1 nga taga Zarraga nga nagpositibo sang nahibaluan nga COVID-19 patient siya.

Ang positibo nga jail officer ang gin-classify sang DOH6 nga si WV59.

Suno kay Peremne, driver si WV59 kag nagdul-ong sila sang mga Personal Protective Equipment, vitamins, kag bulong sa jail facility sa Antique kahapon.

Magluwas sa upod sa salakyan ni WV59, may isa pa gid ka van nga upod nila sa pag-deliver.

Kahapon lang naguwa ang laboratory result kag nadiskubrehan nga positibo si WV59.

Ginpaidalum sa test si WV59 bangud isa siya sa mga frontliners kag expose sa komunidad suno kay Peremne.

Wala sang sintomas nga nabatyagan si WV59 nga gina-quarantine sa pasilidad sa Zarraga.

Nagabyahe sa nagkalain lain nga lugar sa Panay si WV59.

Suno naman kay Dr. Renilyn Reyes sang DOH6, may travel history sa Manila apang sang Pebrero pa si WV59 kag wala man sang comorbidities ukon iban nga mga balatian sa ila inisyal nga impormasyon.

‘Wala sang intensyon’

Nagdepensa naman ang BJMP6 nga wala sila sang intension nga maglapas sa mga protocol ukon magdala sang kahalitan sa Antique.

Suno kay Peremne, wala sila nakahibalo gilayon nga positibo si WV59.

Nagpasalig naman si Peremne nga nag-observe sang precautionary measures ang ila mga personnel nga nag-deliver kag limitado man ang ila exposure.

Sugod sang Marso 20, nag-implementar sang absolute lockdown ang tagdumalahan sang BJMP6 sa 38 ka mga jail facilities sa rehiyon bilang precautionary measure sa COVID-19.

Wala sang personnel nga mahimo makaguwa ukon makasulod sa mga jail facilities.

Ginpahayag ni Antique Governor Rhodora Cadiao nga pa-imbestigaran niya ang insidente.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply