IATF, nagpasiguro nga makig-angut na sa LGU sa pagpauli sang mga OFWs –Mayor Treñas
By: JoMaque | Abril 28, 2020
Iloilo City–Ginpasiguro ni National Task Force COVID-19 Chief Implementer Carlito Galvez kay Iloilo City Mayor Jerry Treñas nga magapakig-angut na sa Local Government Units (LGUs) sa pagpapauli sang mga Overseas Filipino Workers.
Ini suno sa alkalde ang ginpasiguro ni Galvez sa ila pag-istoryahanay subong nga adlaw.
Buwas ginapa-abot ang masobra 200 ka mga OFWs nga mapauli sa Western Visayas sakay sa barko sang 2Go halin sa Manila.
Nagpangayo man suno kay Treñas si Office of Civil Defense 6 Director kag head sang Regional Task Force Jose Roberto Nuñez bangud sa kakulang sang coordination sa LGU sa pagpauli sang mga na-stranded nga OFWs nga nagbiya na kahapon sa Manila.
Magluwas diri, tinguhaan man suno kay Treñas nga ipaidalum sa PCR test ang mga OFWs antes pasugtan nga makapauli.
Suno sa alkalde, nakibot siya kag si Governor Arthur Defensor Jr sang nahibaluan nga ginpaidalum sa rapid test ang mga OFWs nga gin-aprubahan man sang Department of Health bisan nga ang ahensiya mismo ang naghambal nga indi reliable kag conclusive ang resulta. Ang DOH man ang naghambal suno sa iya nga ang PCR test ang gold standard sa COVID-19 test.
Lakip sa 234 ka sakay sang 2Go ang 178 ka taga-Iloilo, 27 diri ang sa Iloilo City.
Suno sa alkalde, ang mga negatibo lang sa PCR test ang dapat pasugtan nga makapauli samtang ang magpositibo dapat nga atenderon anay sa Manila.
Nagpangabay man suno kay Treñas si Galvez nga hangpon nga nagdamo na gid ang kaso sa Manila.
Ginhambal man suno sa iya ni Galvez nga duha ka semana na ang nakaligad halin sang nagmandu siya nga ipahibalo sa mga LGUs nga papuliun sa mga probinsiya ang mga OFWs. Ang problema suno kay Treñas, wala nakalab-ut sa iya ang amo nga direktiba.
Dapat man suno sa iya mahangpan sang national government nga independent ang siyudad sa probinsiya.
Pateniron sa mga hotels sa siyudad ang mga ma-abot nga taga-Iloilo City. Mas maayo ini suno kay Treñas sang pateniron sila sa eskwelahan.
Sa hotel suno sa iya, may kaugalingon nga hulot kag banyo ang kada OFW kag malikawan ang transmission pananglitan may positibo sa ila sa virus.
Ang Overseas Workers Welfare Administration (OWWA) suno kay Treñas ang mabayad sa pag-quarantine sang mga OFWs.