By: JoMaque | Abril 28, 2020

Iloilo City–Matemprano sang sa orihinal nga target nga Mayo 1, ang pagbukas sang St. Therese Hospital para sa mga pasyente sa COVID-19.

Suno kay Iloilo City Mayor Jerry Treñas, diri pateniron ang mga COVID-19-positive pero asymptomatic ukon wala sang sintomas nga mga pasyente.

Kagab-i, ginkumpirmar sang alkalde nga may personnel sang Iloilo City Emergency Responders (ICER) nga nagpositibo sa COVID-19.

Pero iya gin-athag nga wala naga-upod sa mga nagaresponder sa emerhensiya sa field ang amo nga personnel kundi na-assign sa admin.

May contact man ini suno sa iya sa mga frontliners ukon ang mga na-assign sa field kabangdanan nga ginpa-test man ang tanan nga ICER personnel.

Wala na ginsugid sang alkalde kun babaye ukon lalaki ang nagpositibo nga ICER personnel.

“Grounded” suno kay Treñas ang tatlo ka teams sang ICER nga ginabug-usan sang 50-60 ka mga indibidwal.

Ang Jubilee Hall nga ginbakante na sang mga persons under monitoring sadto, liwat nga buksan para sa mga ICER personnel nga i-quarantine. Ang mga magpositibo kag wala symptoms, dal-un sa St. Therese Hospital samtang ang mga magnegatibo, amat-amat suno sa iya nga pagguwaun sa isolation facility.

Samtang indi pa maka-operate ang ICER, maga-standby suno sa alkalde ang Bureau of Fire Protection agud magresponder sa mga emerhensiya.

VOLUNTEER GROUPS

Samtang, lantawon pa ni Mayor Treñas kun sin-o ang mga grupo nga nag-volunteer nga mabulig sa COVID-19 response sang siyudad pareho sang mga nagabantay sa mga checkpoint.

Nalipay ang alkalde nga madamo ang nagabulig base sa impormasyon sa iya ni PSTMO Head Jeck Conlu pero importante suno sa iya nga nahangpan nila kun ano dapat nila nga obrahon nga nasantu sa mga guidelines.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply