By: JoMaque | Abril 30, 2020

Iloilo City — Tubtob lang 8:00 AM sa Abril 30 mahimo makasumiter ang mga Local Government Units sa DSWD6 sang mga ngalan sang mga brgy tanod, barangay health workers, kag iban pa nga wala nakabaton sang ayuda apang qualified sa Social Amelioration Program sang DSWD.

Ini ang ginkumpirmar ni DSWD6 Dir. Ma. Evelyn Macapobre.

Suno kay Macapobre, tubtob lang man 10:00 A.M. sa Abril 30 sila mahimo makasumiter sang mga ngalan sa DSWD Central Office.

Ang matipon nga mga ngalan ang isumiter naman sa Department of Finance.

May numero na ang DSWD6 sang mga barangay tanod kag barangay health workers apang nagapangayo ang DOF sang ila mga ngalan.

P6,000 ang mabaton nga ayuda sang mga qualified nga beneficiaries sang SAP subsidy paagi sa DSWD sa Western Visayas.

Base sa Joint Memo Circular Number 1 sang DSWD,DILG,DBM,DOF,DA, OWWA, kag DTI, ang mga pamilya nga pigado ukon sa informal sector nga nadulaan sang trabaho bangud sang Enhanced Community Quarantine ang mahimo makabaton sang SAP subsidy.

Indi mahimo makabaton sang ayuda ang mga masunod:

1.)Pamilya nga may miembro nga elected ukon appointed government official, permanent, casual, coterminous ukon empleyado nga ginkontrata

2.)Pamilya nga may miembro nga empleyado sa private sector , may sweldo man ukon wala

3.)Pamilya sang retired member nga nagabaton sang pension

4.)Pamilya nga may ikasarang sa pagbakal sang ila kinahanglanon

Wala pa nakahatag sang pahayag ang DSWD6 sa epekto sang pagbaton sang ayuda sang mga beneficiaries sa pag-implementar sang General Community Quarantine sugod sa Mayo 1 sa Western Visayas magluwas sa probinsya sang Iloilo.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply