By: Aine Grace Bravo | via Firingline

ILOILO CITY, May 1, 2020 — Nagpaguwa sang resolution ang Regional Task Force on COVID-19 nga nagasuspender sa pagbaton sang masunod nga batches sang mga repatriated OFWs nga mapauli sa Western Visayas.

Suno kay RTF spokesperson Atty. Roy Villa, pabalikon lang ang mga OFWs kun mapakita sang OWWA nga handa na sila sa orderly kag safe nga repatriation.

Ginpahayag ni Villa nga dapat reliable ang testing process sa mga OFWs, kag kun may gina-request ang RTF nga dokumento, kinahanglan nga on time nga mahatag.

Sa una nga resolution sang RTF, ginpahanugutan ang pagpauli sang repatriated OFWs kun magpa-idalum sa Rapid Test kag negatibo ang resulta.

Matuod suno kay Villa nga may bitbit nga papeles ang mga OFWs nga nagpauli sang Abril 29, pero sang gin-usisa niya, natukiban nga indi resulta sang test ang ila dala kundi certification nga nagahambal nga negatibo sila sa COVID-19.

Sa iya press conference kahapon sang aga, Abril 30, ginbuyagyag ni Iloilo City Mayor Jerry Treñas nga siyam ka nagpauli ang nagpositibo sa Rapid Test.

Ginkuhaan na sila, upod sa iban pa nga nagpauli, sang swab para sa RT-PCR Test kag ginahulat na lang ang confirmatory result.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.