CIDG, magapanguna sa pag-imbestigar sa mga reklamo sang pagpangurakot sang mga local officials sa tagtaganay sang SAP subsidy

By: JoMaque | May 7, 2020

Iloilo–Nagsapol na kahapon, Mayo 6, ang Department of the Interior and Local Government-Iloilo Province, Iloilo Police Provincial Office kag PNP-Criminal Investigation and Detection Group-Iloilo may kaangtanan sa pagahimuon nga imbestigasyon sa mga reklamo nga “corrupt practices” sang mga local officials sa tagtaganay sang emergency assistance sa idalum sang Social Amelioration Program (SAP).

Suno kay DILG Provincial Director Teodora Sumagaysay, ang coordination meeting upod kanday IPPO Director PCol Paul Kenneth Lucas kag CIDG-Iloilo Chief, PLt Emmanuel Tigson, nagtutok sa kun paano himuon ang imbestigasyon kag kun ano nga mga complaints ang hatagan sang prayoridad pareho sang reklamo nga ginbuhinan ang ila P6,000 nga subsidy, mga dummy beneficiaries, mga 4Ps beneficiaries nga nagbaton sang subsidy nga gintunga nila sang barangay officials.

Lakip man sa imbestigaran kaupod sa DSWD ang mga reklamo nga wala sila ginlakip sa mga beneficiaries bisan pa nga qualified sila kag may yara man nga nakabaton bisan pa nga indi sila kwalipikado.

Napasa na suno kay Sumagaysay sa CIDG ang mga reklamo nga una ginpalab-ut sa ila agud masuguran na ang imbestigasyon.

I-involve man suno kay Sumagaysay ang National Bureau of Investigation sa imbestigasyon.

Kun makita nga may rason agud ipasaka ang criminal case, ang CIDG ang mapasaka sang kaso samtang kun admin case naman, i-forward ini sa DILG.

Plano sang team nga mag-set up sang complaint desk para sa mga reklamo sa SAP nga i-base sa IPPO headquarters.

Base sa ila na-istoryahan, mas maayo kun may complainant kag may ebidensiya sa ipasa nga reklamo agud madasig nga masolusyunan.

vcGin-athag naman ni Sumagaysay nga ginahulat pa nila ang official guidelines halin sa central office agud basehan sa himuon nga imbestigasyon.