By: JoMaque | May 7, 2020

Iloilo City — Nagapadayon ang contact tracing sang COVID-19 team sang City Government sa mga naka-contact sa mga nagpositibo sa coronavirus disease sa Brgy. Sto. Niño Sur, Arevalo.

Suno kay COVID-19 team focal person Dr. Roland Fortuna, tubtob kaina, ginabanta na sa 80 ang ila nga na-test.

Naga-coordinate man ang team sa mga barangay officials sa contact tracing.

May nabilin pa nga inug-test sa amo nga barangay suno kay Fortuna bangud may isa naman ka nagpositibo base sa report sang DOH 6 subong nga adlaw.

Sa kabug-usan, may anum na ka positibo nga COVID-19 cases sa Sto. Niño Sur.

“NAKA-DEPLOY NA ANG MGA PULIS”

Ginpasiguro ni Iloilo City Police Office spokesperson PCPT Shella Mae Sangrines nga naka-deploy na ang mga pulis sa border control checkpoints sa Sto. Niño Sur.

Ang mga pulis ang nagabantay agud masiguro nga wala sang nagasulod ukon naga-guwa sa barangay samtang ginapatuman ang tatlo ka adlaw nga extreme ECQ ukon lockdown.

Base sa EO No. 070 ni Iloilo City Mayor Jerry Treñas, nagsugod ang lockdown subong nga adlaw kag magatapos sa Mayo 8.

“NAG-ABOT NA ANG BULIG SANG SYUDAD”

Naka-abot na ang sinaku sang bugas nga bulig sang City Government para sa mga residente nga apektado sang lockdown.

Suno kay Barangay Kagawad Joemarie Millano, head sang Committee on Peace and Order, hatagan sang bugas, manok kag baboy ang mga residente sa sulod sang tatlo ka adlaw nga lockdown.

Nagpasalig man suno sa iya ang alkalde nga ma-provide ang syudadnsang mga bulong.

Ang Sto. Niño Sur ang may 2,015 households, suno sa kagawad.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply