By: JoMaque | May 7, 2020

Iloilo City — Mahimo na malista agud makabaton sang Social Amelioration Program subsidy ang mga household members sang mga 4Ps beneficiaries nga una wala naka-avail sang ayuda bangud nalakip sa gihapon sa roster of beneficiaries sang ila mga ginikanan.

Sa press briefing sang DSWD6 subong nga hapon, ginkumpirmar ni DSWD6 Dir. Ma. Evelyn Macapobre nga nakabaton sila sang Memorandum halin kay DSWD Undersecretary for Operations Atty. Aimee Torrefranca-Neri angut sa paglista sa mga himata sang 4Ps beneficiaries kag iban pa nga mga qualified apang dapat nila magsunod sa gintalana nga mga kondisyon:

1.)Indi grantee sang active household beneficiary sang 4Ps ang indibidwal

2.)Nagapuyo sa lain na nga balay ukon household and indibidwal kag indi man sila 4Ps beneficiaries

3.)Wala na nakabaton sang benepisyo ang indibidwal halin sa 4Ps grant sa diin siya una nga nalista

4.) Nagapuyo sa lain nga balay ang indibidwal sa indi magnubo 2 na ka bulan

5.) Gin-classify ang indibidwal nga moved out member sa Pantawid Pamilya Information System

Suno kay Dir. Macapobre, dapat masunod ang tanan nga mga kondisyon para ma-qualify ang indibidwal.

Paano ma makabig nga moved-out na?

Kinahanglan i-verify kag i-certify sang punong barangay nga tumandok sa ila lugar ang indibidwal (lugar nga una ginapuli-an sang indibidwal).

Dugang diri, kinahanglan man magpirma sa declaration ang pantawid grantee nga nagapamatuod nga indi na kabahin sang ila household ang iya himata nga may kaugalingon na nga pamilya kag separado man nga nagapangabuhi.

Kinahanglan i-sumiter ang tanan nga mga dokumento sa Pantawid Municipal/ City Office.

Una na nagreklamo ang mga kabataan sang 4Ps beneficiaries bangud indi sila makabaton sang ayuda bisan may separado na sila nga pamilya bangud nalista sa gihapon sila bilang beneficiaries sang ila ginikanan.

Ginakuhaan sang Aksyon Radyo Iloilo sang dugang nga pahayag ang DSWD6 natuhoy diri apang wala pa sila nakahatag.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply