Mga konsumedor sa Iloilo City, mabayad sang ila electricity bill sa MORE sugod sa March 2020 billing period — ERC Advisory

By: JoMaque | May 7, 2020

Iloilo City — Ang MORE Electric and Power Corporation na ang mabaton sang bayad para sa elektrisidad sang mga konsumedor sa Iloilo city umpisa sa March 2020 billing period.

Ginkumpirmar ini ni Mr. Roel Castro, ang presidente sang MORE base man sa advisory nga ginpaguwa sang Energy Regulatory Commission (ERC) sang Mayo 6.

Suno kay Castro, masobra 8,000 na ka mga electric bills ang ila napaguwa para sa Marso pero indi normal ang ila pag-umpisa sang billing bangud sang ginpatuman nga enhanced community quarantine (ECQ).

Magluwas sini, nagpaguwa man sang advisory ang ERC nga palawigon ang deadline sa pagbayad sang electric bill kag dugang naman nga advisory nga nagapahibalo nga himuon nga installment ang pagbayad bangud sang COVID-19 crisis.

Ginpahayag ni Castro nga base sa advisory sa ila sang ERC, gintalana sa Mayo 28 ang first billing sang MORE.

Sa pagkamatuod suno sa iya, may 200 na ka mga konsumedor ang temprano nga nakabayad para sa ila electric bill.

Naga-apelar naman si Castro sa mga konsumedor nga indi na magbayad sa PECO bangud ang MORE ang ginakilala sang ERC nga distribution facility sa Iloilo City.