By: JoMaque |May 11, 2020

Iloilo City–Gintalana sa Hunyo 1 tubtob 30 ang enrollment para sa masunod nga school year.

Ini ang ginpahibalo ni Dr. Lea Belleza, spokesperson sang Department of Education 6.

Wala pa sang detalye nga ginhatag ang DepEd kun ano ang proseso sa pagpa-enroll.

Una na gin-anunsiyar ni DepEd Secretary Leonor Briones nga mabukas ang klase sa Agosto 24 pero wala ini nagakahulugan nga dapat magkadto na ang tanan nga estudyante sa mga eskwelahan.

Sa mga pribado nga eskwelahan naman, ginpahayag ni Belleza nga bisan ginahaylo sang DepEd nga magdungan sila bukas sa Agosto pero may mga private schools na suno sa iya nga nagpatimaan sang kahanda nga magbukas na sang klase sa Hunyo.

Pero lantawon sa gihapon suno sa iya sang DepEd ang continuity plan sang mga pribado nga eskwelahan pati na ang ila nga health protocols agud masiguro nga safe ang mga estudyante.

Bisan magbukas sang klase ang mga private schools sa Hunyo pero indi suno kay Belleza pagpahanugutan ang face-to-face classes antes ang Agosto 24.

Sa virtual presser sang DepEd subong nga aga, ginkumpirmar ni Secretary Briones nga gin-aprubahan na sang Inter-Agency Task Force ang learning continuity plan sang ahensiya pero wala ini nagakahulugan suno sa iya nga masige na ang tanan nga aktibidad sang mga eskwelahan.

Mangin “blended learning” ang matabu suno kay Briones ukon kumbinasyon sang virtual, physical kag distance learning.

Magatapos ang school year sa Abril 30, 2021.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply