By: JoMaque | May 11, 2020

Iloilo City — Handa na ang Iloilo City nga ipaidalum sa general community quarantine pagkatapos sang Mayo 15.

Suno kay Mayor Jerry Trenas, bisan pa nga may mga pagkabalaka siya ilabe na nga dulaun ang quarantine passes kun mag-GCQ na “but we have to go on.”

Dugang niya, dapat nga ma-revive ang ekonomiya.

Karon sa hapon, natalana nga magsapol ang alkalde sa ad hoc committee agud maistoryahan ang pagsaylo sang siyudad sa GCQ halin sa enhanced community quarantine.

Ang importante suno sa alkalde nga kun mag-GCQ na ang siyudad, dapat nga sundon gid ang mga guidelines sa “new normal” pareho sang physical distancing kag paggamit sang face mask kag alcohol.

Ginpasiguro man sang alkalde nga bisan mag-GCQ na pero magapadayon gihapon ang food assistance kag community kitchen sa mga barangay.

Importante man suno sa iya ang laboratory para sa COVID-19 tests sa siyudad. Sa pagkamatuod, nagsugod na ang proseso para sa pagbakal sang polymerase chain reaction machine.

May mga pribado nga ospital naman suno kay Trenas nga interesado magbutang sang testing center kag lakip diri ang Metro Iloilo Hospital, The Medical City kag Qualimed.

Nalakip ang Iloilo City sa mga gin-extend ang ECQ halin Mayo 1 tubtob 15.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply