By: JoMaque | May 12, 2020

Iloilo City – Plastado na ang plano sang Iloilo City Government sa tiun nga ipaidalom sa General Community Quarantine halin sa Enhanced Community Quarantine ang Iloilo City.

Suno kay Mayor Jerry Treñas, dapat nga magpabilin ang pagsuksok sang face mask kag i-practice gihapon ang social distancing.

Kun mapaidalom na sa GCQ ang siyudad, himuon nga 9PM tubtob 4AM ang curfew.

Posible man bawion man ang liquor ban, PERO may mga limitasyon sa kun pila ka botelya ang mabakal sang kada tawo kag indi gihapon pwede nga mag-inom sa guwa sang balay.

Pa-aprubahan sang city government sa National IATF ang pag-modify sa limitations sa tion nga bawion ang liquor ban kun kinahanglanon. Nakita sang alkalde nga kun magulpihan ang pagbawi sa liquor ban, indi maayo ang resulta pareho sang natabu sang nagligad.

Indi naman pagpasugtan nga magbukas ang mga spa, sports club, gyms kag mga bars agud mapabilin ang social distancing.

Una na ginpahayag sang alkalde nga handa ang siyudad nga ipaidalom sa GCQ.

Subong nga gab-i, i-anunsyar ni Presidente Rodrigo Duterte kun palawigon ang ECQ sa mga lugar nga may madamo nga kaso sang COVID-19.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply