Iloilo City Mayor Jerry Treñas, nakulbaan sa pagdula sang ECQ sa siyudad sa Mayo 15

By: JoMaque | May 13, 2020

Iloilo City–Gin-ako ni Iloilo City Mayor Jerry Treñas nga ginakulbaan siya sa pagtapos sang enhanced community quarantine sa siyudad sang Iloilo sa Mayo 15.

Suno sa iya, “super immunocomprised” siya kag may mga ginabatyag man sa lawas pero dapat suno sa iya nga maghulag na ang ekonomiya sa siyudad.

Ginpahayag sang alkalde nga madamo nga negosyo ang maputo na gid kun indi pa magbukas pagkatapos sang Mayo 15, “waay ni sang negosyo nga makapadugay kun isira pa gid naton. We really have to move forward,” dugang sang alkalde.

“There are apprehensions and fears. These are not imaginary but real fears,” suno sa alkalde.

Pero bisan may kakulba, “we have to move. Kun ang mga negosyante, nagabatyag subong, kumusta naman ang pumuluyo ta nga nagasalig sa suweldo nila nga inadlaw?”

Pero sa pagtapos sang ECQ sa siyudad, ginpahayag ni Trenas nga amat-amaton ang pagbukas sang mga negosyo kag may mga establishmento nga indi gid anay pagsugtan nga magbalik sa pag-operate pareho sang mga bulangan kag sinehan.

Nagapanawagan ang alkalde sa mga pumuluyo nga sundon gid ang mga health protocols agud malikawan ang infection.