By: JoMaque | May 13, 2020

Iloilo – “Indi kita mag-relax kay wala pa ini matapos.”

Ini ang ginpabutyag ni Iloilo Governor Arthur Defensor, Jr. sang gin-classify ang Iloilo nga isa sa mga low risk areas sa COVID-19 sugod sa Mayo 16.

Suno kay Defensor, dapat i-mentinar ang measures pareho sang social distancing, pagsuksok sang face mask, paghimo sang mass testing kag iban pa bisan wala na sang Enhanced Community Quarantine kag General Community Quarantine sa probinsiya.

Pwede na makaguwa ang mga tawo sa ila balay, pero dapat nga naka-face mask kag ipabilin ang social distancing, i-practice ang disinfection kag pagpanghugas sang kamot.

Ginpasiguro sang gobernador nga hugton gihapon ang mga border control checkpoints.

Kun magbalik na ang byahe sang barko kag eroplano, ang mga local strandees lang nga taga- Iloilo ang pasugtan nga makasulod sa probinsiya bangud may mga high risk areas sa COVID-19 sa pungsod. Dapat gihapon nga mag-agi sa nagakaigu nga protocol kag close monitoring ang mga local strandees nga makasulod kag ibalik ang health declaration card.

Pasugtan nga makabukas ang mga negosyo, pero indi malakip ang mga may close contact pareho sang mga spa.

Makabyahe naman ang public transport, pero dapat i-mentinar ang social distancing.

Ginatun-an pa kun ipabilin ang liquor ban sa probinsiya.

Ginpasalamatan man sang gobernador ang mga pumuluyo sa kooperasyon samtang napaidalom sa ECQ ang Iloilo.

Mapaguwa sang Executive Order ang gobernador agud iplastar ang dapat ipabilin kag ginapasugtan sa tiun nga dulaon na ang ECQ sa Iloilo.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply