Western Visayas, iban pa nga areas, ginpaidalum sa GCQ sugod Mayo 16, 2020 — Presidential spokesperson Harry Roque

By: JoMaque | May 14, 2020

Indi “new normal,” indi “modified enhanced community quarantine” kundi magapaidalum sa “general community quarantine” ukon GCQ ang bilog nga Pilipinas, magluwas lang sa NCR, Laguna kag Cebu City (nga yara sa modified ECQ), sugod Mayo 16 base sa gin-amend nga IATF Resolution No. 35.

Ini ang paathag ni Presidential Spokesman Harry Roque sa iya press briefing subong nga udto.

Nagpagguwa kahapon ang IATF sang Resolution No. 35-A nga nagabalik sa mga low-risk areas sa GCQ.

Ini na ang ikatatlo ka sunod nga adlaw nga nagbag-o bag-o sang announcement ang IATF paagi kay Roque.

Mayo 12 sang gin-anunsiyar ni Roque nga indi na pag-ipaidalum sa anuman nga community quarantine (ECQ/GCQ) ang mga gin-classify nga low risk areas lakip diri ang Western Visayas.

Kahapon, nagbag-o ang statement sang IATF kag gin-anunsiyar nga ipaidalum sa modified GCQ ang mga low risk areas.

Pero subong naman, gin-announce ni Roque nga mabalik sa GCQ ang mga low risk areas.

Una diri ginpa-athag sang IATF ang mga steps nga halin sa ECQ, ipaidalum ang mga areas sa modified ECQ pakadto sa GCQ, masunod ang modified GCQ antes ang new normal.