Workers sa informal sector, mahimo sa gihapon makabaton sang assistance sa DOLE6 bisan nagtakop na ang BKBK program
By: JoMaque | May 14, 2020
Iloilo — Mahimo sa gihapon makabaton sang assistance ang mga workers sa informal sector halin sa Department of Labor and Employment 6 bisan nagtakop na ang Barangay Ko Bahay Ko ukon BKBK Program nga para sa nadulaan sang trabaho bangud sa COVID-19 threat.
Suno kay DOLE 6 Spokesperson Niezel Sabrido, nagtakop sang nagligad Marso ang BKBK Program bangud naubos na ang gintigana nga pondo sa amo nga programa.
Sugod subong nga bulan, mahimo mag-apply ang mga workers sa informal sector sa Tulong Panghanapbuhay sa ating Disadvantage/Displaced Workers.
Mahimo sa gihapon makabaton sang P395 kada adlaw nga sweldo ang mga workers kag magalawig sang 10 ka adlaw ang programa.
Sa baylo magpaninlo lang sa ila balay ukon palibot, mahimo sila maka-deliver, mang-repack, ukon distribute sang relief goods depende sa ipa-obra sa ila sang Local Government Unit.
Kinahanglan lang nila magpalista sa mga barangay officials ukon LGU nga amo ang ma-coordinate sa DOLE 6.
Kinahanglan naman sang barangay officials ukon sang LGU nga magsumiter sang letter of intent, work program, kag listahan sang mga beneficiaries sa DOLE.
Sa BKBK Program sang DOLE6, masobra 34-Million ang nagamit nga pondo para sa masobra 12,000 ka mga workers sa informal sector.