Delivery truck nga may karga duha ka karton sang makahulubog nga ilimnon, nadakpan sa border control sa Badiangan

By: JoMaque | May 18, 2020

Badiangan, Iloilo– Nadakpan sa border control ang delivery van nga may karga duha ka KARTON sang makahulubog nga ilimnun sa Brgy. Teneclan, Badiangan las 5 kahapon sang hapon, May 17.

Suno kay Police Staff Sergeant Romy Aligante sang Badiangan Police Station, halin sa Janiuay kag naglabay sa border control ang delivery truck nga ginamaneho ni Novie Galan upod si John Lariosan sang San Miguel, sang ginpadulog sang mga pulis kag ginpamangkot kun ano ang sulod sang truck. Ginhambal sang driver nga goods lang pero natukiban nga may duha ka karton sang makahulubog nga ilimnun.

Ginpahayag sang driver nga ginapanag-iyahan sang private individual ang truck nga nag-deliver sang goods sa convenience store.

Dugang ni Galan nga sa Roxas pa niya ginbakal ang makahulubog nga ilimnun bangud wala sang liquor ban. Ipa-inum ni Galan ang whisky sa mga panday sa ila balay.

Ginpapuli nalang ang driver kag ang iya nga upod kag nagdesisyon nga mabayad nalang sang multa sa municipal treasurer’s office.