DOH6, nagtadlong sang ila pahayag angut sa ikaduha nga BJMP6 personnel nga nagpositibo sa COVID-19
By: JoMaque | May 20, 2020
Iloilo (UPDATE) — Gintadlong sang DOH6 ang ila pahayag angut kay WV100, ang ikaduha nga BJMP6 personnel nga nagpositibo sa COVID-19.
Suno kay Dr. Ma. Julia Villanueva, ARD sa DOH6, Mayo 1 una nga gin-subject sa RT PCR test si WV100 upod sa 72 ka iban pa nga mga jail personnel sa BJMP6 nga mga residente sa probinsya sang Iloilo. Naga-quarantine sila sa BJMP6 office sa Buhang, Jaro.
Gin-conduct ini sang Provincial Health Office kag Mayo 6 naguwa ang resulta nga lunsay sila negatibo.
Mayo 12 sang nag-swab naman ang City Health Office sa 53 ka nabilin nga mga jail personnel lakip ang 30 ka iban pa.
Nalakip sa gin-subject liwat sa RT PCR test si WV100 bangud sang breach sa quarantine protocol.
Sang May 14, nadiskubrehan nga positibo si WV100. Negatibo naman ang iban pa.
Sa una nga pahayag ni Dr. Villanueva kahapon (Mayo 18), ginpahayag niya nga sang Mayo 12 pinakauna nga gin-subject sa RT PCR test si WV100.
Ini ng base sa Evidence Based Surveillance and Response Report nga ginsumiter sang Provincial Epediomology and Surveillance Unit.
Sa pinaka-ulihi nga pahayag ni Dr. Villanueva, nakumpirmar nga una na nga gin-subject sa RT PCR test si WV100 sang Mayo 1 pagkatapos gin-check ang iya case investigation form.
Sang Abril 25 nagsugod sa pag-quarantine ang mga BJMP6 personnel bangud nagpositibo ang upod nila nga gin-identify si WV59.
Lampas na sa 14 day incubation period ang pag-conduct sang RT PCR test sa mga jail personnel.
Ang Local Government Unit ang naga-schedule sang pagkuha sang specimen.
Paano na-infect?
Posible nagasugod pa lang ang infection kay WV100 sa una nga gin-swab rason negatibo sa una nga resulta suno kay Dr. Villanueva.
Dugang niya, posible man nga indi ‘proper’ ang pagkuha sang specimen sa una nga test rason negatibo ang una nga resulta.
Mahimo i-subject liwat sa RT PCR test ang indibidwal bangud posible infected apang negatibo ang naguwa sa resulta.
Dugang ni Dr. Villanueva, indi man ‘absolute’ ang resulta rason dapat suportahan man ini sang clinical findings sang doktor.