Health workers sa Western Visayas nga nagpositibo sa COVID-19, naglab-ot na sa 11
By: JoMaque | May 21, 2020
Iloilo City — Naglab-ot na sa 11 ka mga health workers sa Western Visayas ang nagpositibo sa COVID-19 suno sa Department of Health 6 (As of today, May 20).
Suno kay DOH6 Assistant Regional Director Dr. Ma. Julia Villanueva, lima sa amo nga numero ang mga doktor, tatlo ang mga nurses, kag tag isa ang radiologic technologist, Iloilo City Emergency Response personnel, kag Barangay Nutrition Scholar personnel.
Na-record ang pinakamadamo nga nagpositibo nga health care workers sa Iloilo City nga naglab-ot sa pito, duha sa probinsya sang Iloilo, kag tag isa sa Aklan kag Capiz.
Health worker ang pinaka-ulihi nga COVID-19 patient sa Western Visayas (as of May 20).
Suno kay Dr. Villanueva, nurse si WV105 nga 32-anyos nga lalaki nga taga Roxas City, Capiz.
Wala sang sintomas nga nabatyagan si WV105 nga naga-home quarantine.
Wala sang exposure sa confirmed COVID-19 case si WV105.
Sa 30,635 health workers sa rehiyon lakip ang mga barangay health workers, utility workers, kag administrative staff, 1,182 pa lang ang na-subject sa RT PCR test.
Wala pa sa 1% sa mga health workers sa rehiyon ang na-subject sa RT PCR test.
Ang RT PCR test ang ‘gold standard’ para makumpirmar kun may COVID-19 ang indibidwal.