By: JoMaque | May 21, 2020

Iloilo — 60 ka karton sang makahulubog nga ilimnon ang nakumpiskar sa checkpoint sa Barangay Nanga, Guimbal kaina.

Suno kay Police Patrolman Tommy Macalalag sang Guimbal Police Station, ginparahan sa checkpoint ang van nga ginamaneho ni Leo Faldas, 47-anyos sang Zone 4, Barangay Boulevard, Molo.

Gin-usisa kag ginpa-abrihan ang van, nakit-an ang kinarton nga makahulubog nga ilimnon.

Ginpahayag ni Macalalag nga dal-on sa banwa sa Miag-ao ang kinarton nga alcoholic drinks.

Gin-aresto naman ang pulis nga naga-convoy sa van makaligad gin-alegar nagpasilabot sa pagdakop kay Faldas.

Ginkilala ini kay Police Staff Sergeant Jose Digcabo-on Jr sang Barangay Nam-o Norte, Miag-ao, assigned sa Regional Personnel Holding and Accounting Unit (RPHAU) sa Police Regional Office 6.

Dugang ni Macalalag, sang buksan ang van, nagpanaug sa awto si Digcabo-on kag nagsiling sa Guimbal Police nga indi pagbuksi bangud iya ini sang grupo.

Bisan madamo sang rason ang pulis gindakop ini kaupod si Faldas nga gin-custody sa Guimbal Police Station.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply