By: JoMaque | May 22, 2020

Carles, Iloilo – Nagreklamo ang 12-anyos nga dalagita nga gin-rape sang 17-anyos nga lalaki sa Carles sang Mayo 20 sang hapon.

Suno kay Police Senior Master Sergeant Rhea Gaton, head sang Women and Children’s Protection Center sang Carles Police Station, gin-alegar sang tagreklamo nga natabo ang insidente la 1:00 sang hapon sa balay sang dalagita.

Base sa panaysayon ni alyas Nene, nagpauli siya para magkuha sang ballpen apang may nag-abot nga tatlo ka lalaki kag ginpunggan siya nga magguwa.

Ginpahayag man sang 12-anyos nga ang 17-anyos lang nga solterito ang nag-rape sa iya kag nagabantay lang sa ila pwertahan ang duha pa ka lalaki.

Naabtan sang 17-anyos nga magulang ni Nene ang natabo gani nagpangayo siya sang bulig sa barangay tanod.

Wala naabtan sang mga tanod ang tatlo ka lalaki sa balay sang dalagita, pero nadakpan sila sa ila mga balay.

Masami nga isahanon si Nene sa ila balay bangud nagalakat agud mag-obra ang iya amay kag magulang.

Apat na ka tuig nga nagbulagay ang iloy kag amay ni Nene.

Napasakaan na sang kaso nga rape ang tatlo ka ginareklamo. Gin-refer sa DSWD ang 17-anyos, samtang detained sa Carles MPS ang duha pa nga naga-edad sang 18-anyos kag 25-anyos.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply