By: Aine Grace Bravo

ILOILO CITY, May 25, 2020 — Patay ang 30-anyos nga radiologic technologist kag anay ICER member nga si Henry Jun Jardio sang nabungguan sang awto ang iya ginamaneho nga motorsiklo sa Pison Avenue, Brgy. San Rafael, Mandurriao las 11:16 kagab-i, Mayo 24.

Dead-on-arrival sa ospital si Jardio sang nabungguan sang awto nga ginamaneho ni Harjinder Gil, 44-anyos nga Indian national.

Papuli na halin sa trabaho si Jardio sang natabu ang aksidente.

Nagtuyo pa magpalagyo si Gil pakadto sa R. Mapa, Tabucan, Mandurriao, pero nabungguan niya ang isa pa ka motorsiklo nga may tatlo ka sakay.

Ginkilala ang mga pilason nga sanday Bonn Seann Sanz, 34 sang San Jose, Molo; Jane Recaforte, 20 sang Kalibo, Aklan kag John Chasmer Tupaz, 21 sang Barotac Viejo.

Suno kay Police Staff Sergeant Jessei Cabial Jr sang Mandurriao Police Station, padayon nga ginabulong sa nagkalain-lain nga ospital ang tatlo nga napilasan.

Ginpahayag ni Cabial nga nagapanimaho sang makahulubog nga ilimnon si Gil sang natabo ang aksidente.

Detain ang driver sang awto kag natalana pasakaan sang kaso. | via Jorge Cabrera

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.