By: JoMaque | May 25, 2020

Gin-release sang Land Transportation Office ang revised set sang implementing rules and regulations (IRR) para sa Republic Act 11235, ukon ang Motorcycle Crime Prevention Law.

Sa 13 ka pahina nga dokumento nga napetsahan sang Mayo 11 kag ginpirmahan ni LTO chief Engr. Edgar Galvante, gina-require ang mga riders nga maggamit sang decal number plates nga nagatakos sang 135 mm by 85 mm sa atubang sang motorsiklo, imbes nga dako kag metal plates nga una gin-propose.

Ang likod naman nga plates nagatakos sang 235 mm by 135 mm nga mas dako sang sa ginagamit subong.

Kinahanglan nga readable ang naka-print sa plaka suno sa LTO.

Naghatag man sang color scheme kag rules ang transportation office kun sa diin ibutang ang stickers sa kada rehiyon.

Magamulta ang indi magsunod sa IRR.

Ang motorsiklo nga may unreadable license plate ukon wala sang plaka, magamulta ang owner sang P50,000 tubtub P100,000. Iga-impound man ang motorsiklo.

Ang mga tag-iya nga wala nakaparehistro sang ila motorsiklo sa sulod sang lima ka adlaw ang magamulta sang P20,000 tubtub P50,000. Posible man sila nga mapreso.

Ang mga ma-tamper naman sang ila license plates ang iga-penalize sang P50,000 tubtub P100,000, kapareho sang multa sang mga owners nga nagagamit sang ginkawat nga plate.

Wala ginapahanugutan ang indibidwal ukon kompaniya nga magbaligya sang motorsiklo nga wala naga-comply sa number-plate provisions.

Ang laye gin-author ni Senator Richard Gordon kag ginpirmahan ni Presidente Rodrigo Duterte sang Marso 2019 pero gin-suspend bangud sang public pressure.

Linibo ka mga motorcycle riders ang nag-protesta kag nagrason nga naga-interfere sa aerodynamics ang dako nga plaka sa atubang sang motorsiklo kag posible nga maglupad kun madasig ang pagpadalagan ukon mapalid ini sang mabaskog nga hangin. 

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply