Indian national nga nakabunggo patay sa frontliner sa Mandurriao, nakapiyansa

By: JoMaque | May 27, 2020

Iloilo City — Nakapiyansa sang P90,000 ang Indian national nga si Harjinder Gil nga nakabunggo-patay sa radiologic technologist sa Pison Avenue, Brgy. San Rafael, Mandurriao sang Domingo sang gab-i, Mayo 24.

Nagpiyansa si Gil sa kaso nga reckless imprudence resulting to homicide and damage to property.

Suno kay Police Staff Sergeant Jessie Cabial Jr., traffic investigator sang Mandurriao Police Station, nagpangayo sang pasensya ang Indian national sa pamilya ni Henry Jun Jardio sang nakita-ay sila pero desidido ang pamilya nga dayunon ang kaso batok kay Gil.

Papuli na halin sa trabaho si Jardio sakay sa iya motorsiklo sang nabungguan sang awto ni Gil.

Natalana naman operahan ang driver sang motorsiklo nga may duha ka angkas nga nabungguan man ni Gil sa iya pagpalagyo pakadto sa Brgy. Tabucan, Mandurriao.

Suno sa iloy ni Bonn Seann Sanz, madul-ong kuntani ang iya bata sa duha niya kaupod nga call center agents sang naaksidente.

Nagapangayo sang bulig ang iloy sa Indian national nga buligan sila sa gasto sa pagpa-ospital sang iya bata.