Leon Mayor, nagpa-athag ngaa wala natapos panghatag ang SAP subsidy sa deadline sang Mayo 10

By: JoMaque | May 27, 2020

Iloilo — Ginapreparar na ni Leon Mayor Ma. Lina Holipas ang sabat sa show cause order sang DILG kun ngaa wala natapos sang LGU ang distribution sang subsidy sa idalum sang Special Amelioration Program sa deadline sang Mayo 10, 2020.

Suno sa alkalde, Abril 26 sila nagsugod sa pagpanghatag sang cash assistance. Pero nagsulat siya sa DSWD kag nagpangayo sang extension.

Ginrason ni Mayor Holipas nga kalabanan sa 85 ka barangay nila ang nabukid kag mabudlay ang transportasyon.

Gindugang pa ni Holipas nga ang pabag-o bag-o nga guidelines sang DSWD ang isa man sa mga rason kun ngaa naatrasar ang distribution. Natapos na suno sa iya ang ila tagtaganay sang Mayo 15.

Si Holipas, upod sa mayors sang Oton, Tigbauan, Tubungan kag Alimodian, ang ginpadal-an sang show cause order sang DILG kag ginhatagan sang 48 oras para magsabat may kaangtanan sa compliance sa SAP subsidy distribution. | via BBB