Mga liquor-related incidents sa Iloilo City, nagtulod kay Mayor Jerry Treñas nga ibalik ang liquor ban

By: JoMaque | May 27, 2020

Iloilo City – Gintumod ni Iloilo City Mayor Jerry Treñas nga rason sa pagbalik sang liquor ban sa Iloilo City ang mga liquor-related incidents sa syudad.

Base sa Executive Order No. 82 Series of 2020 ni Treñas, epektibu gilayon ang pagbalik sang liquor ban. Pero bangud wala pa napahibalo ang mga establisyemento, maga-epekto ang mandu bwas, Mayo 27.

Isa sa mga insidente suno kay Treñas ang natabu sa radiologic technologist kag anay volunteer sang ICER nga si Henry Jun Jardio, 30 anyos, nga nabungguan-patay sa San Rafael, Mandurriao sang salakyan nga ginamaneho sang Indian national nga naka-inom. Ginakasubo sang alkalde ang natabu sa COVID-19 frontliner.

Ginbuyagyag niya man nga 15 ka mga liquor-related incidents ang gin-report sang CDRRMO halin sang gindula ang liquor ban sa Iloilo City sang Mayo 16.

Indi na gusto ni Treñas nga madugangan ang iya problema ilabe pa nga padayon ang pamahog sang COVID-19 pandemic.

Gin-athag sang alkalde nga indi na pwede ang pagbaligya kag pagbakal sang makahulubog nga ilimnon.

Bawian man sang business permit ang establisyemento nga madakpan nga magbaligya sang makahulubog nga ilimnon. | Via Firingline