Oton Mayor Carina Flores, nakapadala na sang sabat sa show cause order sang DILG angut sa SAP distribution
By: JoMaque | May 27, 2020
Oton, Iloilo–Nakapadala na sang written explanation kay DILG Undersecretary Epimaco Densing subong nga adlaw si Oton Mayor Carina Flores may kaangtanan sa isyu sa pagpanagtag sang social amelioration.
Suno sa alkalde, nabaton niya ang show cause order nga ginpadala paagi sa opisina ni Governor Arthur Defensor Jr kahapon, May 26.
Ginpahayag ni Flores nga nalab-ut nila ang 80% compliance sa pagpanagtag sang ayuda sa May 10 nga deadline sang DILG.
May pamatuod suno sa iya nga 80% compliant sila sang amo nga petsa para sa 15, 907 target benefiaries–ang pinakadamo nga benepisyaryo sa probinsiya sang Iloilo.
Natapos na suno sa iya subong ang payout bisan nga na-delay bangud man sang pabag-o bag-o nga guidelines sang DSWD.
Sang una suno sa iya, tam-an ka istrikto sang qualifications nga gintalana sang DSWD pero nagbag-o sang ulihi kabangdanan nagbalik man sila pang-ukay sang Social Amelioration Cards nga una na-disqualify.
Nagalaum si Flores nga mahangpan sang DILG ang iya paathag.
Dugang niya, madamo ang na-disappoint nga taga-Oton bangud wala sila na-qualify pero kuntani suno sa iya maintiendihan nila nga indi tanan mahatagan bangud man sa guidelines nga gin-set sang DSWD.
Isa si Flores sa lima ka mga mayors sa probinsiya nga ginhatagan sang DILG sang 48 oras para magsabat sa show cause order angut sa compliance sa SAP distribution.
Magluwas sa iya, ginpangayuan man sang paathag ang Tigbauan, Tubungan, Alimodian kag Leon.