Masobra 87,000 waitlisted/left-out families sa Western Visayas, mahimo makabaton sang SAP subsidy – DSWD 6

By: JoMaque | May 29, 2020

Iloilo City — 87,073 ka mga waitlisted/left out families sa Western Visayas ang mahimo makabaton sang Social Amelioration Program subsidy.

Suno kay DSWD6 Dir. Ma. Evelyn Macapobre, 196,826 ang kabug-osan nga numero sang mga waitlisted/left out families sa rehiyon apang 87,073 lang ang mga may ngalan nga nasumiter sang Local Government Units.

Ang mga may ginlista lang nga mga may mga ngalan ang mahimo makabaton sang ayuda.

Ang mga waitlisted/left-out families ang kabahin sang 5 Million additional beneficiaries nga makabaton sang ayuda bangud sang COVID-19 threat.

Base sa DILG Memorandum Circular 2020-086 nga gin-issue sang Mayo 21, may tubtob lang sang Mayo 22 ang mga city ukon municipal officials sa pagsumiter sa DILG Regional Office kag DSWD Regional Office/Field Offices sang initial list sang waitlisted/ left-out beneficiaries.

Ginatinguhaan pa sang Aksyon Radyo Iloilo nga makuhaan sang dugang nga pahayag ang DILG6 kag DSWD6 natuhoy sini.