By: JoMaque | May 30, 2020

Guimaras — Ginapreparahan na sang Provincial Government sang Guimaras ang “new normal” samtang padayon ang pagpakig-away sa COVID-19 pandemic.

Suno kay Guimaras Vice Gov. John Edward Gando, nagsapol ang executive committee kag nahisugtan ang mga pagbag-o sa ginapatuman nga sistema sa pagguwa kag pagsulod sa isla.

Epektibu Hunyo 1, 2020, “relax” na ang mga pagsulundan sa luyag magkadto sa Iloilo City kag mga non-residents nga maga-abot sa Guimaras .

Pasugtan ang pagsulod sa isla para sa essential nga transaksyon pareho sang trabaho ukon negosyo, pero indi gihapon pagpasugtan ang leisure purpose (pareho sang paglagaw-lagaw) sang mga non-residents.

Pwede naman makabiyahe ang mga bata.

Samtang, may mga tourist spots nga buksan na, pero maga-cater lang sa subong sang mga taga-Guimaras .

Wala na sang dal-on nga requirements agud makasulod sa Guimaras, pero mas maayo nga magdala sang ID, suno kay Gando.

Ipatuman man ang health declaration card kag iban nga health protocols.

Ang magkadto sa Guimaras, hatagan sang inbound pass, samtang ang residente nga magguwa sa isla, hatagan sang outbound pass.

TRANSPORTASYON

Balik na ang biyahe sang mga pump boats nga sunrise-sunset, samtang ang biyahe sang RORO vessels kag Yohan, balik man nga halin las-kuwatro sa kaagahon tubtob las-siete sa gab-i.

Ang biyahe naman sang mga public utility vehicles, halin las-kuwatro sa kaagahon tubtob las-otso sa gab-i.

Samtang, ginbuksan ang Sebaste Wharf, pero para lang sa cargoes. Nagapabilin naman nga sirado ang puerto sa Nueva Valencia.

DUGANG NGA PAHANUMDOM

Pwede makabakal ukon makadala sang alcoholic drinks, suno kay Vice Gov. Gando, pero ginadumilian ang pag-inom sa pampubliko nga lugar.

Ang business hours naman, halin las-sa aga tubtob las-6 sa gab-i. | via Firingline

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply