Remote Enrollment System, ipatuman sang DepEd sa pag-umpisa sang isa ka bulan nga enrollment sugod Hunyo 1

By: JoMaque | June 1, 2020

Ipatuman sang Department of Education ang ginatawag nga remote enrollment system sa tuyo nga mabuhinan, kun indi man lubos nga madula, ang physical enrollment para sa masunod nga school year.

Katuyuan man sini nga mahagan-hagan ang risgo sang transmission sang coronavirus disease ukon COVID-19.

Indi pareho sang nagligad nga mga school year, pwede nga makapa-enroll ang mga ginikanan ukon guardians sang ila kabataan nga indi na kinahanglan magkadto sa eskwehalan sa pagsugod sang isa ka bulan nga enrollment period sa mga pampubliko nga eskwelahan sugod subong Hunyo 1.

Suno kay Department of Education 6 spokesperson Dr. Lea Belleza, pagakolektahon ang enrollment information paagi sa sistema nga mas kumbinyente sa mga manunudlo kag ginikanan pareho sang phone calls, text messaging ukon online submission.

Magluwas sa basic information sang mga estudyante kag ila mga ginikanan ukon guardian, magatipon man sang impormasyon ang mga manunudlo sa household capacity kag access sa distance learning sang mga estudyante.

Una na ginpahayag ni Education Secretary Leonor Briones nga yara sa mga ginikanan ang pagdesisyon kun bala luyag nila nga padayunon sa formal education ang ila kabataan sa masunod nga school year.