By: JoMaque | June 2, 2020

Iloilo City — Una nga nagnegatibo sa RT PCR test si WV112, ang ika-apat nga BJMP6 personnel nga COVID-19 patient sa Western Visayas.

Suno kay Dr. Renilyn Reyes sang DOH6, Mayo 12 una nga gin-swab si WV112, 52 anyos nga lalaki nga taga Lapaz upod sa iban pa nga mga jail personnel nga naga-quaranitne sa BJM6 regional office sa Buhang, Jaro.

Mayo 13 na-release sang Western Visayas Medical Center Sub-National Laboratory ang resulta kag negatibo si WV112.

Mayo 20 liwat nga ginswab ang 43 ka mga jail personnel lakip kay WV112 pagkatapos nagpositibo si WV106 nga upod man nila sa pag-quarantine.

Mayo 22 naguwa ang resulta kag lunsay negatibo ang 42 magluwas kay WV112 nga gin-swab pa gid sang Mayo 23.

Kulang ang RNA sa specimen ni WV112 rason ginswab siya liwat suno kay Dr. Reyes.

Mayo 29 narelease ang laboratory result kag nadiskubrehan nga positibo si WV112 sa COVID-19.

Asymptomatic ukon wala sang sintomas nga nabatyagan si WV112 nga naka-facility quarantine.

Paano siya na-infect?

Sang Mayo 12 nga specimen ni WV112, negatibo ang resulta apang sang liwat nga gin-swab sang Mayo 23, nagpositibo na siya.

Mayo 12 man sang ginsaylo si WV112 kag ang iban pa nga mga jail personnel sa pribado nga quarantine facility halin sa ila regional office.

Naga-quarantine sa kada kwarto sa hotel ang mga jail personnel.

Suno kay Dr. Reyes, posible dyutay pa lang ang kagaw sa lawas ni WV112 sang Mayo 12 rason wala na-detect sa RT PCR test.

Una na ginpahayag sang DOH6 nga indi maayo ang quarantine facility sang BJMP6 rason gin-subject ang tanan nga mga jail personnel nga naga-quarantine.

Wala man na-certify sang DOH6 ang BJMP6 regional office bilang quarantine facility.

Ano ang epekto sini sa iban pa?

Ginpahanugutan na nga makapauli ang 42 ka mga jail personnel nga may negatibo nga resulta.

Sang ginpamangkot ang DOH6 kun i-subject liwat sa RT PCR test ang mga nakapauli ilabi nga una man nga nagnegatibo si WV112 apang nadiskubrehan nga COVID-19 patient, ginpahayag ni Dr. Reyes nga i-swab lang sila liwat kun may mga sintomas nga mabatyagan.

Asymptomatic ang tatlo ka mga jail personnel nga una na nagpositibo sa COVID-19 nga gin-identify kanday WV59, WV100, kag WV106.

Ginakuhaan pa sang pahayag sang Aksyon Radyo Iloilo ang BJMP6 natuhoy sini.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply