By: JoMaque | June 3, 2020

Iloilo City (UPDATE)– Ginpasakaan kaso sang National Bureau of Investigation ang duha ka pulis kag duha ka iban pa sa kontrobersiyal nga twin shooting incidents sang Enero 19 sa syudad sang Iloilo.

Ginkumpirmar ni NBI OIC Eric Distor nga ginpasaka ang kaso nga murder kag theft batuk kanday PCpl. Jerry Carmelotes Villanueva, PCpl. Joseph Andrew Poneles Joven, kag duha ka mga John Does sa pagtiro patay kay Delfin Britanico, ang bata ni former Representative Salvador Britanico.

Sa imbestigasyon sang NBI-Death Investigation Division, ang mga suspetsado man ang nagtiro patay kay Allen Muller sa Jaro, pila ka minutos antes gintiro patay si Britanico.

Gin-verify sang NBI sa Land Transportation Office ang salakyan nga gingamit sang mga suspetsado kag nadiskubrehan nga ginrentahan lang ini.

Gin-ako sang tag-iya sang Car Rental nga si Joven ang nag-renta sang gray Adventure sang duha ka adlaw kag tubtob sa Enero 20.

Gin-ako ni Joven sa tag-iya nga ang ginrentahan niya nga salakyan ang gingamit sang ila grupo nga get-away vehicle sa pagpatay kanday Muller kag Britanico.

Suno sa NBI, gin-ako ni Joven nga siya ang driver sang ila grupo. Dugang niya, pagkatapos gintiro patay si Muller, nagpondo ang ila salakyan sa bakante nga lote sa Nabitasan, Lapaz para kakason ang white stickers sa salakyan apang nakita sila ni Britanico.

May nagluntad nga komprontasyon tubtob nga gintiro man nila si Britanico.

Ginhingyo man ni Joven ang tag-iya sang car rental nga itudlo si Osting Del Pilar nga drug-related target sang ila grupo, pananglitan imbestigaran siya sa pagtiro patay kanday Muller kag Britanico.

Gin-identify naman si Villanueva sang isa pa ka witness.

Ginpasaka ang theft bangud wala nakita sa lugar ang cellphone ni Britanico nga gingamit pa niya sa pagtawag sa iya asawa antes ang insidente.

May witness man nga nakakita nga may ginkuha sa karsada ang isa sa mga suspetsado.

Ipasaka man ang kaso administratibo sa duha ka mga pulis.

Ginakuhaan pa sang Aksyon Radyo Iloilo sang dugang nga pahayag ang NBI amo man ang Police Regional Office 6.

Ginatinguhaan man sang Aksyon Radyo Iloilo nga makuhaan sang pahayag ang mga pulis nga ginpasakaan sang kaso.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply