By: JoMaque | June 3, 2020

Iloilo City (UPDATE) – Gintadlong sang Department of Health6 ang ila data kay Western Visayas 115, ang pinaka-ulihi nga COVID-19 patient sa Western Visayas.

Sa press briefer paagi sa Facebook sang DOH6 kaina sang hapon (Hunyo 2), ginpahayag ni Dr. Jessie Glenn Alonsabe, regional epedimiologist sa DOH6 nga sang Marso 27 nagpauli sa Iloilo si WV115, ang 39 anyos nga lalaki nga taga Anilao.

Hunyo 2 naguwa ang resulta kag nadiskubrehan nga positibo siya sa COVID-19.

Sang ginkuhaan sang dugang nga pagpa-athag si Dr. Alonsabe, gintadlong niya nga sa baylo Marso 27, Mayo 27 nakapauli sa Iloilo si WV115.

Pebrero 28 naka-abot sa Iloilo si WV115 halin sa Spain.

Nagpa-Manila siya sang Marso 13 agud magproseso sang mga papeles para magbalik sa Spain apang na-abtan sang community quarantine tubtob nga nakapauli sang Mayo 27 sa Iloilo.

Wala sang available data si Dr. Alonsabe kun ano ang ginsakyan ni WV115 papauli sa Iloilo apang ginkumpirmar nga may tatlo ka upod si WV115 halin sa Manila kag nag-quarantine sa Anilao.

Negatibo ang resulta sa RT PCR test sang tatlo ka iban pa.

Sa pagpangusisa sang Aksyon Radyo Iloilo, may duha ka sweeper flights nga nag-abot sa Iloilo sang Mayo 27 halin sa Manila, 154 ang sakay sa una nga flight samtang 150 naman sa ikaduha nga flight.

Naka-classify si WV115 nga repatriated OFW sa bulletin sang DOH6 apang gintadlong man ni Dr. Alonsabe nga indi siya makabig OFW kag sa baylo, Locally Stranded Individual bangud madugay na siya nga nakapauli sa pungsod.

Naka-facility quarantine si WV115 nga asymptomatic ukon wala sang sintomas.

Nagakuha pa sang dugang nga impormasyon ang DOH6 kasunod sang gin-report nga ginhilanat (slight fever) si WV115 sang Mayo 29.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply