By: JoMaque | June 4, 2020

Iloilo City — Pulis ang duha sa apat ka mga suspetsado sa twin shooting incidents sa Iloilo City sang Enero 19, 2020 suno sa National Bureau of Investigation.

Sa exclusive interview sang Aksyon Radyo Iloilo kay Atty. Zulikha Marie Conales, agent on case sa Death Investigation Division sang NBI Central Office, ginpahayag niya nga ang mga suspetsado amo kanday PCpl. Jerry Villanueva kag PCpl. Joseph Andrew Joven kag nakilala sila paagi sa mga testigo kag forensic evidence.

Mayo 29 sang ginpasaka sa Department of Justice ang murder kag theft batuk sa duha ka mga pulis nga assign sa Police Regional Office 6 kag sa duha pa gid ka wala pa makilala nga mga suspetsado.

‘Wrong place, wrong time’

Indi direkta nga konektado ang pagtiro patay kanday Allen Muller sa Cuartero, Jaro kag Delfin Britanico sa Nabitasan, La Paz sang Enero 19.

Suno kay Atty. Conales, si Muller ang target sang apat ka mga suspetsado.

Halin sa Cuartero, Jaro, naglabay sa Diversion Road, Mandurriao ang Mitsubishi Adventure nga ginsakyan sang mga suspetsado kag nagliko sa service road pakadto sa Nabitasan, La Paz.

Nagpondo sa higad sang karsada sa Nabitasan ang salakyan kag ginkakas sang duha ka mga lalaki nga sakay sa Adventure ang mga ginpapilit nga stickers.

Sa amo man nga tyempo, naglabay sa lugar si Britanico sakay sa iya motorsiklo.

Nakita ni Britanico ang pagkakas sang stickers tubtob nga nagluntad ang komprontasyon kag gintiro sang mga suspetsado si Britanico.

Wala na-recover sa lugar ang cellphone ni Britanico nga gingamit niya sa pagtawag sa iya asawa antes siya gintiro.

Pero na-recover sang NBI ang stickers nga ginkakas sang mga suspetsado kag gin-identify man sang mga testigo sa Cuartero, Jaro nga may amo nga sticker ang Mitsubishi Adventure nga gingamit sang mga suspetsado sa pagtiro patay kay Muller.

Halin sa Nabitasan, nagliko pakadto sa Jalandoni Bridge, General Luna Street, Brgy. President Roxas ang salakyan kag pinaka-ulihi nga nakit-an sa Lapuz.

‘Na-identify ang salakyan, nag-ako ang ginsugiran’

Gintabunan sang mga suspetsado sang puti nga papel ang plate number sang salakyan apang nakakas ini rason na-identify sang NBI ang tag-iya sang salakyan.

Gin-ako sang mga tag-iya nga ila ang salakyan, apang nanindugan nga gintugyan nila ini sa car rental sugod sang Enero 4.

Gin-ako naman ang tag-iya sang car rental nga nag-transaksyon sa iya sa pagrenta sang salakyan sang duha ka adlaw si Joven.

Nagtawag si Joven sa tag-iya nga ma-extend sila sa pag-renta sang salakyan. Liwat nga nagtawag ang tag-iya kay Joven kag nagpahibalo nga luyag niya makigkita diri.

Gin-ako ni Joven sa tag-iya nga gingamit nila ang salakyan sa shooting incident.

Liwat nga nagtawag si Joven sa tag-iya kag nagpahibalo nga ginkakas nila ang tanan nga modifications sa salakyan kag ginkuha man ang tint.

Ginhambalan naman ni Joven ang tag-iya nga itudlo kay certain Osting Del Pilar ang shooting incidents kun may ma-imbestigar sa iya.

Sa pagpangusisa sang NBI, kapin tatlo na ka tuig nga nagapuyo sa Luzon si Del Pilar kag ginpanginwala niya nga may kaangtanan siya sa pagtiro patay kanday Muller ukon Britanico.

Wala na-establisar sang NBI kun ano ang motibo sa pagtiro patay kay Muller, apang sa pagpati sang mga kasilingan niya suno kay Atty. Conales, may kaangtanan ini sa illegal nga druga.

Una na gin-identify sang ICPO nga drug personality si Muller.

‘Background sang 2 pulis’

Ginkumpirmar ni PRO6 Spokesperson Lt. Col. Gilbert Gorero nga assign sa Iloilo City Police Office si Joven samtang sa Regional Headquarters Support Unit naman si Villanueva.

Gin-restrict na ni PRO6 Director Rene Pamuspusan si Villanueva, samtang Absent Without Official Leave si Joven.

Sa pagpangusisa sang Aksyon Radyo Iloilo, ginpahayag ni ICPO Spokesperson Capt. Shella Mae Sangrines nga sa City Personnel Holding and Accouting Unit ang pinaka-ulihi nga assignment ni Joven.

Marso 14 sang nagsugod siya sa pag-absent kag wala nagasabat kun tawgan.

Sa amo nga adlaw, gin-subject sa random drug test ang pila ka mga pulis sa ICPO, kag lakip man kuntani si Joven.

Ginhatagan si Joven sang oportunidad para magpa-subject sa drug test apang wala na siya nakabalik sa opisina.

Ginpasakaan si Joven sang grave neglect of duty kag less grave neglect of duty.

Ginatinguhaan pa sang Aksyon Radyo Iloilo nga makuhaan sang pahayag ang mga pulis nga ginpasakaan sang kaso.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply