By: JoMaque | June 9, 2020

Iloilo – Koordinasyon lang ang gina-ayo ni Iloilo Governor Arthur Defensor, Jr. sa mga nagapatigayon agud makapauli sa Iloilo ang mga locally stranded individuals (LSIs).

Ginhalimbawa ni Defensor nga pila lang ka oras antes sila ginpahibalo nga may manug-abot nga LSIs sa probinsiya. Kun kaisa suno sa iya, banwa lang ang nakabutang sa listahan kag wala sang pangalan sang mapauli.

Bangud sini, ginpahayag sang gobernador nga ginabutang sa risgo ang ikaayong lawas sang mga pumuluyo sa probinsiya. Nagapanginlaman lang suno sa iya ang probinsya bangud halin ang iban sa mga LSIs sa high risk areas ukon may mataas nga kaso sang COVID-19.

Mapreparahan suno sa iya kun husto ang koordinasyon kag maplastar ang pagsugat sa mga LSIs sa port of entries.

Gin-athag sang gobernador nga wala siya nagapamalabag sa pagpauli sang mga LSIs, kundi koordinasyon lang ang iya ginapangayu agud malikawan nga maglapta ang COVID-19.

Dapat man suno sa iya nga respetuhon ang quarantine protocols nga ginapatuman sang Iloilo.

Gin-deploy sang Iloilo Provincial Government ang Provincial Quarantine Team agud mag-monitor sa mga port of entries kag mag-check sang temperatura sang mga maabot nga LSIs. Sila man ang mapahibalo sa kabanwahanan nga may manug-abot sila nga LSIs.| Via Firingline

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply