By: JoMaque | June 11, 2020

Aklan — Nagguwa sa ila balay ang 28-anyos nga lalaki nga Overseas Filipino Worker nga taga-Lezo bisan naka-home quarantine.

Ang OFW nadiskubrehan nga positibo sa COVID-19 kag gin-classify sang Department of Health kay WV 125.

Suno kay Dr. Cornelio Cuatchon Jr. sang Aklan Provincial Health Office, Hunyo 2 sang gin-swab ang OFW kag ginpahanugutan nga makapauli apang dapat mag-observe sang home quarantine.

Hunyo 7 na sang na-release ang resulta kag nadiskubrehan nga nagpositibo siya sa COVID-19.

Sa tunga-tunga sang las-12 sa udto tubtob las-12:30 sa hapon sa amo nga adlaw, nagpahibalo ang Aklan PHO sa Local Government Unit sang Lezo nga nagpositibo ang OFW.

Wala sang available nga data si Dr. Cuatchon apang base sa gin-report sa iya, hapon sang Hunyo 7 sang naguwa sa ila balay ang OFW kag nagkadto sa balay sang iya himata sa ila man nga barangay bangud gin-imbitar nga magpanyaga.

Tatlo tanan ka balay ang ginpahayag nga ginkadtuan sang OFW.

Responsibilidad sang LGU kag Barangay Health Emergency Response Team sa barangay ang pagsiguro nga naga-home quarantine ang OFW suno kay Dr. Cuatchon.

Sa contact tracing sang PHO, 18 ka mga indibidwal ang may exposure sa OFW kag 10 sa ila ang gin-identify nga mga high risk contacts kag natalana nga i-swab.

Gindala na sa ospital ang OFW nga wala sang sintomas nga nabatyagan.

TIMELINE

Marso 30- naka-abot siya sa Pilipinas halin sa Germany

May 7- gin-swab siya

May10- naguwa ang resulta nga negatibo siya sa COVID-19

May 26- naka-abot siya sa Kalibo via plane. Nagtenir siya sa Aklan Training Center

May 28- gindala siya sa Ligtas COVID Center sa Kalibo

Hunyo 2- gin-swab liwat kag ginpahanugutan nga makapauli

Hunyo 7- naguwa ang resulta kag nadiskubrehan nga positibo siya sa COVID-19

Suno kay Dr. Cuatchon, naga-home quarantine lang sadto sa Manila si WV125 kag may kahigayunan nga nagaguwa man sa iya ginateniran bisan na-swab na.

Tuman man ka damo sang mga OFWs sa quarantine facility rason ginpahanugutan nga makapauli apang dapat mag-observe sang home quarantine.

Base sa IATF Resolution Number 40, ginmanduan ang DILG nga magpahanumdom sa mga LGUs sang ila responsibilidad nga pahanugutan ang mga OFWs nga may negatibo nga RT PCR test result nga makapauli kag mag-observe sang home quarantine. | via Aksyon Aljohn Torreta

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply