By: JoMaque | June 12, 2020

Aklan — Ginpahanugutan nga makapauli sa ila balay ang duha ka mga Overseas Filipino Workers bisan wala pa sang resulta ang ila RT PCR test nga gin-conduct sa Western Visayas.

Ang gintumod nga mga OFWs, nagpositibo sa COVID-19 kag gin-classfy kanday WV125 kag WV126 base sa data sang Department of Health 6.

Suno kay Dr. Cornelio Cuatchon Jr. sang Aklan Provincial Health Office, ginpahanugutan nga makapauli ang mga OFWs sa kondisyon nga magpa-idalum sila sa home quarantine.

Ginbasehan sang Aklan PHO sa amo nga desisyon ang IATF Resolution Number 40 nga nagamandu sa DILG nga magpahanumdom sa mga LGUs sang ila responsibilidad nga pahanugutan ang mga OFWs nga may negatibo nga RT PCR test result nga makapauli kag mag-observe sang home quarantine.

Bisan una na nga nag-negatibo sa RT PCR test halin sa Manila, liwat nga gin-subject sa RT PCR test ang mga OFWs sa ila pag-abot sa rehiyon base sa nahisugtan sang Regional Inter Agency Task Force.

May 10 ka mga indibidwal sa Lezo, Aklan nga natalana i-subject sa RT PCR test bangud may high risk contact sa ila si WV125 nga gin-report nagguwa sa ila balay bisan naga-home quarantine.

Responsibilidad sang LGU ang pagsiguro nga naga-home quarantine ang mga OFW, suno kay Dr. Cuatchon.

Ano ang disposisyon sang DOH?

Suno kay Dr. Mary Jane Juanico sang DOH6, mahimo makapauli direkta sa ila balay ang mga OFWs nga may negatibo nga RT PCR test result, apang dapat mag-observe sila sang quarantine.

Dugang niya, dapat na-assess man sang doktor ang indibidwal antes pahanugutan nga makapauli.

Base sa pagtuon sang World Health Organization, mahimo mangin positive sang tubtob walo ka semana ang indibidwal bisan asymptomatic ukon wala sang sintomas nga nabatyagan.

Sa 130 ka confirmed COVID-19 cases sa rehiyon as of June 10, 50 sa ila ang mga OFWs.

85 naman sa mga COVID-19 patients ang mga asymptomatic.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply