Mga lugar nga napa-idalum sa ECQ sang Mayo 1-15, basehan sa second tranche sang SAP –DSWD 6

By: JoMaque | June 13, 2020

Iloilo City — Nagpa-athag si DSWD 6 spokesperson May Castillo kun ngaa Iloilo province (lakip ang Iloilo City) kag Bacolod City lang ang mga lugar sa Western Visayas nga makabaton sang second tranche sang cash subsidy sa idalum sang Social Amelioration Program.

Suno kay Castillo, base ini sa rekomendasyon sang Inter-Agency Task Force sa diin ginbasehan nga makabaton sang second tranche ang mga lugar nga napa-idalum sa enhanced community quarantine (ECQ) sang Mayo 1 tubtob Mayo 15, 2020.

Makabaton naman sang 2nd tranche ang mga benepisaryo man sang 1st tranche, lakip ang mga left-outs.

Wala pa suno kay Castillo sang schedule sa pag-release, pero ginhatagan ang DSWD sang tubtob Hunyo 24 agud matapos ang pagpanghatag sang subsidy.

Wala naman sang pilahay sa distribution bangud ipaagi sa electronic means pareho sang pera padala, magluwas lang sa mga lugar nga wala sang network signal sa diin mangin door-to-door ang hatagay. | via Firingline