By: JoMaque | June 13, 2020

Gin-admit na sa Aklan Provincial Hospital ang 28-anyos nga repatriated seafarer sa Lezo, Aklan nga naglagaw bisan naka-home quarantine kag natukiban sang ulihi nga positibo sa COVID-19.

Suno kay Ernan Baldomero, secretary ni Lezo Mayor Lenette Fernandez kag manager sang Aklan Ligtas COVID-19 Center, June 2 sang nagpauli ang seaman upod sa lima pa ka taga-Lezo kag sa amo man sila nga adlaw gin-swab.

Bangud puno na ang mga hotels, ginpapuli ang mga OFWs pero ginpa-athag gid sa ila nga dapat mag-quarantine sila.

June 4 tubtob 7, ginpahayag nga naglagaw ang seaman, nagkadto sa ginapaobra niya nga balay sa pihak nga barangay, nagpanyaga sa iya tiyo kag nagkadto pa sa birthday celebration.

June 7, nagguwa ang resulta sang test sa diin natukiban nga nagpositibo siya sa COVID-19. Gilayon siya ginkuha sang Provincial Health Office kag gindala sa ospital.

Ginka-alarma ini indi lang sang iya barangay kundi sang bilog nga banwa ilabe na sang nahibaluan nga naglagaw siya.

10 ang nalista nga nagka-close contact sa amo nga seaman nga amo si WV 125.

Sa pagpangusisa, natukiban nga ginpabalik niya sa ila balay ang iya ginikanan nga ginsaylo sa pihak nga balay sang nag-abot siya.

Ginpahayag ni Baldomero nga gin-insist sang amo nga seaman sa Barangay Health Emergency Response Team nga negatibo siya sa COVID-19 base man sa RT-PCR test result sa iya sa Manila sang Mayo 27.

Wala man niya gina-atubang ang miembro sang BHERT nga nagakadto sa ila balay agud mag-monitor sa iya, “arogante siya, daw indi niya gid mabatun-baton nga i-quarantine siya after pila ka bulan nga sa barko siya. Ginsupak niya gid ya ang mga instructions sa iya,” suno kay Baldomero.

Gindugang ni Baldomero nga wala nagasugid sang matuod ang seaman sang ila ginpamangkot kun naglagaw siya. Natukiban man nga wala nag-quarantine sa hotel sa Manila ang seaman kundi nagtenir sa iya tiya sa Pandacan.

Ginahulat subong sang Provincial Health Office ang resulta sa ikatatlo nga swab test sa seaman. Naka-home quarantine naman ang tanan niya nga naka-contact kag ginahulat pa ang resulta sang ila test.

Hulaton sang LGU nga magguwa ang resulta sang dugang nga test sa seaman antes magdesisyon kun ano ang ila mangin aksyon ilabe na nga sila pa suno kay Baldomero ang ginapagguwa sang pasyente nga butigon. Sa subong suno kay Baldomero, ginatinguhaan gid nila nga mapaayo ang pasyente kag handum man nila nga magnegatibo ang resulta sang iya mga naka-contact.

Dugang niya, madamo nga taga-Lezo ang naka-eksperiensiya sang diskriminasyon bangud sa natabu. | via Aksyon Hotline, June 12, 2020

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply