By: Aine Grace Bravo

ILOILO CITY, June 15, 2020 — Nadesisyunan sa meeting ni Iloilo City Mayor Jerry Treñas upod sa COVID team kaina sang aga nga i-lockdown sang tatlo ka adlaw ang BFP Regional Office matapos nagguwa ang resulta sa RT-PCR test sang isa nila ka personnel halin sa Cebu nga positibo siya sa COVID-19.

Bilang government agency suno sa alkalde, dapat nga magsunod sa mga regulasyon sang LGU ang BFP agud malikawan ang paglapta sang COVID-19.

Suno sa alkalde, “Madamu kita sang gina ubra nga mga inisyatibo para malikawan kag matapna ang COVID-19 diri sa aton syudad. Hindi naton pagtugutan nga mauyang lang ang mga pinangabudlayan kag mga sakripisyo sang mga Ilonggo.”

June 5 nag-abot sa siyudad ang BFP personnel halin sa Cebu kag kahapon, June 14, nagguwa ang resulta sang iya test.

Una nga gin-quarantine sa hotel ang personnel sang nag-abot sa siyudad pero Hunyo 9, ginsaylo siya sa BFP headquarters. Ginpahayag sang BFP6 nga may approval sa DOH ang pagsaylo sang personnel sa ila headquarters.

Base sa Executive Order No. 091 ni Mayor Treñas, nagsugod ang lockdown subong nga adlaw kag magalawig tubtob sa Hunyo 18, 2020. | via Hotline/Iloilo City Government

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.