By: JoMaque | June 19, 2020

Iloilo City — Gin-relieve ni Iloilo City Mayor Jerry Treñas ang apat ka mga empleyado sang Iloilo City Zoning Office kag isa ka empleyado sa City Planning Office bangud sa pagkadto sa private beach resort sa Anini-y, Antique.

Pero ginklaro sang alkalde nga ang pag-relieve sa mga empleyado indi bangud sa nauna nga impormasyon nga naka-updanay sila sang taga-BFP6 nga nagkadto sa resort ukon bangud sang isyu sa COVID-19.

Gin-athag niya nga lain ang petsa sang pagkadto sang taga-BFP sa kasubong nga resort kag lain man ang adlaw nga nagkadto ang taga-City Hall.

Ang relief order suno kay Treñas bangud natukiban sa inisyal nga pagpangusisa nga naga-transaction sa taga-Zoning Office ang tag-iya sang resort.

Suno sa iya, ang dugang nga imbestigasyon magasentro sa conflict of interest kag posible violation sa ethical standards sang mga empleyado.

Sa naglapta nga pictures, upod sang mga empleyado sa pagkadto sa resort ang ila asawa.

Nangin kontrobersiyal ang BFP6 bangud sa pagkadto sa Boracay sang ila mga personnel upod ang regional director. Upod man sa grupo ang 26-anyos nga fire officer nga naka-quarantine dapat kag natukiban sang ulihi nga nagpositibo siya sa COVID-19.

Nagguwa man ang impormasyon nga antes sila nagpa-Boracay, nagkadto pa sila sa beach resort sa Anini-y, Antique.

Ginpahayag sang alkalde nga base sa iya impormasyon, wala naka-upod sa resort ang nag-positive nga fire officer. | via Aksyn Hotline

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply