By: JoMaque | June 25, 2020

Iloilo City — Gin-ako ni Iloilo City Mayor Jerry Treñas nga naglain ang iya pamatyag sang nahibaluan nga pila ka locally stranded individuals ang naglapas sang quarantine protocol bisan wala pa naka-abot ang resulta sang ila RT-PCR test, kag nagguwa sang ulihi nga positibo sa COVID-19.

Suno sa alkalde, “may ma-basketball, may ma-manicure, may mainom… gatagay pa.” Maayo lang suno kay Mayor Treñas nga wala niya nakit-an ang mga salawayon nga LSIs, “kay kun nakit-an ko, tapungulon ko gid.”

Indi na ensakto suno kay Treñas ang pamatasan sang iban nga LSIs nga wala ginpaminsar ang daku nga sakripisyo sang mga Ilonggos halin pa sang ginpa-idalum ang syudad sa Enhanced Community Quarantine. Dugang sang alkalde, bisan nakapa-idalum sa modified GCQ ang syudad sa subong, nagasakripisyo gihapon ang iban nga sektor pareho sang mga senior citizens kag menor-de-edad nga ginadumilian sa pagguwa.

Ginapatun-an sang alkalde ang proposed ordinance sa City Council nga magapabaskog sang penalidad sa mga LSIs nga magalapas sang quarantine protocols.

Bangud sa breach of protocols, nadesisyunan ni Mayor Treñas upod sa COVID-19 team nga indi na pag-ipa-idalum sa home quarantine ang mga LSIs nga maabot. Sa baylo, dal-on sila sa local government facility quarantine para sa 14-day quarantine. Kun indi magtenir sa facility sang syudad, pwede makapa-hotel ang LSI pero kaugalingon na niya nga gasto.

Nagpamat-ud man ang COVID-19 team nga indi na maggamit ang syudad sang rapid test, kundi RT-PCR test na.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply