By: JoMaque | June 25, 2020

Iloilo City — Sa baylo mag-home quarantine lang, mas maayo gid kun ipaidalum sa facility quarantine ang mga Locally Stranded Individuals samtang wala pa sang resulta ang ila RT PCR test.

Ini suno kay Atty. Roy. Villa, Spokesperson sang Regional Inter Agency Task Force pagkatapos ginreport nga may LSI nga taga Ingore, Lapaz nga nagpa-manicure, nag-basketball, kag nag-inum inom pa bisan gin-abisuhan nga mag-home quarantine kay wala pa sang resulta ang iya RT PCR test.

Magluwas sa iya, may LSI man nga taga Camalig, Jaro nga naghiwat sang selebrasyon sa ila balay kag nagbaton pa sang mga bisita bisan wala pa man sang resulta ang iya RT PCR test kag gin-abisuhan man nga mag-home quarantine.

May LSI man nga fire officer sa syudad nga ‘nag-party party’ sa Boracay Island upod ang 27 ka iban pa nga mga fire personnel bisan nagpirma siya nga dapat istrikto nga mag-observe sang home quarantine kay wala pa sang resulta ang iya RT PCR test.

Suno kay Atty. Villa, mas maayo kun i-facility quarantine ang mga LSIs agud maseguro nga wala sang may malapas sa quarantine protocol.

Indi naman maka-obligar ang RIATF bangud wala ini nalakip sa guidelines sang IATF. Dugang niya, kinahanglan man ikonsiderar ang kapasidad sang LGU sa pagpahamtang sang facility quarantine. | via Aksyon Aljohn Torreta

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply