Pakaisa sang LSI sa Ingore La Paz nga positibo sa COVID-19, nagreklamo matapos siya nabantugan nga positive sa virus
By: JoMaque | June 27, 2020
Iloilo City — Naglain gid ang buot ni alyas Jomar sang Ticud, La Paz, matapos siya nabantugan nga amo ang nagpositibo sa COVID-19.
Suno kay Jomar, “ang ginapangayo ko nga protocol, indi nila pag-i-tsimis sa bilog nga Mansaya, Bo.Obrero, ako nga ginkuha sang pulis, kag gin-aresto ako kag gindala sa ospital.”
Pakaisa niya ang Locally Stranded Individual halin sa Manila nga nag-abot sa Iloilo sang June 12 kag natukiban sang ulihi nga nagpositibo sa COVID-19.
Imbes magpauli sa iya gina-arkilahan nga balay sa Mansaya ang amo nga LSI, nagdiretso siya sa ginpa-obra nga kamalig sa Ingore kag didto nag-inum-inom upod sa iya mga kilala, nagpa-manicure kag naghampang pa sang basketbol.
Hunyo 17 na sang nabalahuba sa Ingore nga halin gale siya sa Manila.
35 ka residente ang naka-contact sang LSI sa Ingore.
Gin-quarantine man ang mga utod ni Jomar sa Mansaya nga nakabisita sa LSI sa Ingore. Pero nakagguwa na suno sa iya ang resulta sang ila test kag negatibo sila sa virus.
Ginkumpirmar ni Jomar nga nagkadto man sa iya balay sa Ticud ang LSI tatlo ka adlaw matapos siya nag-abot sa Iloilo pero wala niya ginpasulod kag may antad man sila nga tres metros samtang naga-istoryahanay.
Ginkumpirmar man ni Jomar nga nagkumpanyar pa ang amo nga LSI sa lubong sa Loboc, Lapuz base sa mga pictures nga nakita niya sa ila group chat.
Ginpahayag ni Jomar nga bangud siya ang nasal-an kag nabantugan nga nagpositibo sa virus, naapektuhan pati ang iya trabaho.
Gusto gid ni Jomar nga ipadakop ang nagpabantog nga positibo siya sa COVID-19.
Nagapanawagan man siya sa mga barangay officials nga magbulig agud mauntat na ang paglapta sang impormasyon nga positibo siya sa virus.